Simu ya Tecno Spark 20 Pro+ ilitoka rasmi desemba ya mwaka 2023 ila kwa Tanzania imeanza kupatikana miezi ya karibuni

Kwa Tanzania bei ya juu kabisa ya Tecno Spark 20 Pro+ ni shilingi laki sita, hii ikiwa na ukubwa wa GB 256

Kuzijua sifa za spark 20 Pro+ itakupa picha ya jumla na sababu ya simu kuwa na bei hiyo

Na hivyo pia kuwa na ufahamu iwapo simu ina vigezo vinavyokizi mahitaji yako

Hivyo basi kitu cha kwanza tutazame sifa zake.

Sifa za Tecno Spark 20 Pro+

Tutazamie ubora na udhaifu wa sifa muhimu za hii Tecno

Uwezo wa Network

Tecno Spark 20 Pro+ ni simu ya 4G kwa maana haina mtandao wa 5G

Aina ya 4G inayotumia ni LTE Cat 13 ambayo kasi yake ya juu kabisa ni 650Mbps

Iwapo kuna mtandao wa simu unaotoa kasi hii basi simu itakuwa inapakuwa mafaili kwa muda mfupi

Ila kwa sasa kasi kubwa zaidi utaipata ukiwa unatumia 5G kwa hapa Tanzania

Kwa mfano 5G ya Tigo ina kasi mpaka 1Gbps (zaidi ya 1000Mbps)

Kwa bahati mbaya 5G imesambaa maeneo machache sana nchini

Ubora wa kioo cha Tecno Spark 20 Pro+

Kioo cha Tecno Spark 20 Pro+ kina uoneshaji mzuri wa vitu na muonekano mzuri wa rangi

Kioo chake ni cha AMOLED chenye resolution ya 1080×2436 pixels

Mbali na resolution kubwa, kioo kina refresh rate inayofika 120Hz

Uzuri wa refresh rate kubwa huifanya simu kuwa fasta wakati wa kutachi(kuperuzi)

Ila huwa ina ulaji mkubwa wa chaji

Hata hivyo mfumo wa tecno unaruhusu kuzima na kuweka refresh rate ya kawaida

Kwa simu nyingi za gharama za mwaka 2024 zimekuwa zikitumia vioo vya LTPO AMOLED ambazo huwa na uwezo wa kudhibiti kiwango cha refresh rate kulingana na aina ya matumizi

Nguvu ya processor Helio G99 Ultimate

Nguvu ya processor ya Helio G99 Ultimate ni ya wastani

Hii ndio chip iliyotumika na simu ya spark 20 pro plus, na inacheza gemu nyingi kwa ufanisi mkubwa

Njia nzuri ya kupima nguvu ya processor ni namba za fps unapocheza gemu

Zikiwa kubwa zaidi ya 60 basi hiyo chip ni nzuri

Helio G99 Ultimate inazalisha mpaka FPS 80 kwa gemu ya PUBG Mobile ila kwenye setting ndogo za graphics

Haina nguvu kubwa kama Snapdragon 8 gen 3 ila ni processor nzuri kwa simu za daraja la kati

Helio G99 Ultimate ina core mbili zenye nguvu ya wastani zinazotumia Cortex A76

Uwezo wa betri na chaji

Betri ya Tecno Spark 20 Pro+ ina ukubwa wa 5000mAh na chaji yake inapeleka umeme wa wati 33

Simu nyingi zenye chaji ya wati 33 hujaza betri ya simu kwa dakika 80 kama muda wa juu kabisa

Na betri ya mAh 5000 inaweza kustahimili kukaa na chaji kwa zaidi ya masaa 10

Ila kwa mpenzi wa magemu ukaaji wa chaji hauwezi kuzidi masaa kumi

Magemu huifanya processor kutumia nguvu kubwa inayotumia umeme mwingi

Chaji yake ni ya USB Type C (zile zenye kichwa kipana)

Ukubwa na aina ya memori

Kuna toleo la aina moja tu la Tecno Spark 20 Pro+ upande wa memori

Ukubwa wake wa memori ni GB 256 na RAM 8GB

Memori hii inatosheleza kuhifadhi mafaili mengi  na RAM ya GB 8 inasaidia kufungua vitu kwa wakati mmoja bila kukwama

RAM ndogo inakuwa na changamoto ya kujaa kwa haraka hivyo kuna nyakati unakuta simu inaganda ganda

Aina ya memori ya hii simu ni UFS 2.2 inayoweza kusafirisha data kwa kasi inayofika 1200MBps

Uimara wa bodi ya Tecno Spark 20 Pro+

Bodi ya Tecno Spark 20 Pro+ imetengenezwa kwa glasi upande wa mbele na nyuma kuna plastiki

Ina viwango vya IP53 vinavyoashilia uwezo wa simu kuzuia maji ya kiwango cha kuchuruzika

Ila maji yanaweza penya kama ikizama kwenye kina kikubwa

Kiujumla umakini ni kitu cha muhimu kwa hii simu

Pamoja na uwepo wa kioo upande wa mbele kununua screen protekta kutaimarisha uimara wa simu

Maana hata vioo vya Gorilla hupasuka pia

Ubora wa kamera

Hii simu ina kamera mbili ila kiuhalisia kamera ipo moja tu

Kamera yake ina megapixel 108 inarekodi video za resolution ya 1440p kwa fremu za 30fps

Kwa picha chache nilizoziona ni kuwa ubora wa picha ni mzuri ila kwenye kamera ya selfie kamera inang’arisha sana kiasi cha kutokutoa muonekano halisi wa kitu

Changamoto hii nimeiona kwenye simu nyingi za infinix

Inawezekana ikawa kwa sababu inalenga watu wanaopenda kuposti mitandaoni

Hivyo inaondoa uhitaji wa filters

Lakini kamera inayotoa vitu kwa muonekano wa asili ndio nzuri zaidi

Ubora wa Software

Tecno Spark 14 Pro inakuja na toleo la Android 14

Kitu kikubwa kwenye toleo la Android 14 ni matumizi ya akili bandia

Ina mfumo wa akili bandia unaotengeneza wallpaper

Kwa bahati mbaya mfumo huu hautengenezi picha kwa kuandika maneno kuelezea namna picha unavyotaka iwe

Ni mfumo ndio unaotengeneza wallpapers kwa namna unavyoamua

Washindani wa Tecno Spark 20 Pro+

Tecno Spark 20 Pro+ inaenda kukutana na ushindani kutoka matoleo ya Samsung Galaxy A55, Samsung Galaxy A35, Redmi Note 13 Pro, Oppo A79

Tukianza na redmi note 13 ina sifa zinazofanana kwenye kioo na kamera

Ila ina kamera mbili za ziada zenye lenzi ultrawide na macro

Na pia inakuja na mtandao wa 5G

Ushindani upo kwenye bei, kwani Redmi Note 13 ina bei sawa na Tecno Spark 20 Pro+

Oppo A79 inazidiwa ubora wa kioo na hata kamera ila sifa nyingine zinafanana ikiwemo utendaji

Ila bei ya Oppo A79 ipo chini na ina 5G, hii inaweza mshawishi mtumiaji kutumia oppo a79 badala ya spark

Neno la Mwisho

Bei ya Tecno Spark 20 Pro+ inaendana na bei ya simu nyingi za daraja la kati

Na sifa zake nyingi ni za kuvutia ila kuacha kuweka mtandao wa 5G inaweza ikawa ni changamoto hasa kwa kipindi ambapo simu mpya nyingi zinatoka

Japo kwa soko la hapa nchini 5g inapatikana maeneo machache, ila simu ya 5G inampa mtu kujiamini pindi mtandao ukisambaa maeneo mengi